佇咱台灣母語復振推捒 ê 運動中，最近上蓋重要 ê 討論 tō 是根據《國家語言發展法》要求佇「國民基本教育」各階段 ài 將「國家語言」列入去「部定課程」內底，本土語言應該改做國高中必修，無疑悟 8 月 17 號竟然去予教育部「課審會」初審 ê 國中分組否決。
「課審會」前一工 8 月 16 號，我 kap 兩位台語前輩鬥陣去「國家」教育研究院台北院區參加「十二年國民基本教育本土語文課綱草案」ê 北區公聽會。博萮 teh 會中登記第一个發言，以下是發言 ê 重點，有一部分因為時間關係（每一人只有 3 分鐘）無法度全部講了，賰--ê 就用文字提供予主辦單位，有一寡是後來想著閣追加--ê ，整理予逐个參考。
頭一步，咱就 ài 為咱台語人 ê 母語正名。
台語就是台語，台語毋是、嘛毋通號做「閩南語」，「閩語」、「閩南語」是做為一个語系、語群 ê 「分類」，毋是對特定語種 ê 「稱呼」，台語毋是中國的「方言」。所以 thōng 要緊--ê ，就是 ài 冗早將「台語」正名、棄捒過去以「中國」為中心、正統 ê 思考方式 kap 立場。
若是有客語人對「共台語號做台語」有意見、欲主張客語嘛 ài 號做「台語」，嘛歡迎客語族群朋友去向客家委員會訴求對《客家基本法》來修改𪜶族群語言 ê 名稱。
第二，既然這馬《國家語言發展法》已經通過，咱就 ài 挕捒用中華話做思考基礎 ê 心態。像主辦單位提供予咱這幾本手冊，應該莫用中華文、ài 直接用台文、客語文、原住民族語文來書寫，這就表示咱主管機關 ê 心態，猶原是用中華語為頂位做思考基礎。
毋管是用漢字正字抑是羅馬字，若是連主管機關 to 無能力用全母語來思考，咱欲按怎來教育咱 ê 囝仔、欲按怎要求教學現場 ê 老師？若是驚講有人看無，應該是 ài 準備對譯版本，毋是孤提供一種中華文 ê 版本，ài 予每一種本土語言使用者攏會當受著完整 ê 尊重。
第三，咱這馬有真濟家長拼命 leh 共細漢囝仔講台語/母語，但是囝仔大漢了後，suah 無法度連結學校教育。囡仔一旦去學校上課，就變做全中華語 ê 環境，自校長、老師到同學，強欲全部攏是中華語使用者，學生囡仔欠缺會當對話 ê 對象，甚至連老師嘛無一定會曉講，無法度予語言能力閣較進步。這部分毋管課綱按怎修改、加強，攏無可能補救。
這表示咱本土語言教育無應該是基本教育 ê 附屬品，應該是主體，一禮拜一節這款設計是絕對無夠--ê 。真正想欲改善這馬母語流失 ê 狀況，應該 ài 規定 teh 咱 ê 教育體系中，設置全母語學校（毋但是「浸潤式教學」爾爾），對幼稚園、國小、國中、高中職基礎教育，到大學以上 ê 高等教育，所有 ê 學科攏 ài 直接用母語來上課。毋管是社會、自然、音樂、體育、抑是數學、微積分，甚至是英文等外語，攏 ài 有法度用母語來教學，教授、碩士生、博士生嘛會當用母語來做學問、做研究；無免感覺這無可能，人香港久長以來就是按呢 ê 教育環境（這嘛漸漸受著中國政府愈來愈重 ê 壓迫，圖博、維吾爾族、南蒙古嘛攏是），這部分嘛需要對教師訓練開始做起。
第四，我嘛會當了解，現階段欲達成我頭前講 ê 目標猶需要 時間。咱現階段會當先做--ê ，是 優先獎勵有能力用全母語開學科課程 ê 老師，予 in 佇學校開正式課程。另外，除了有通過語言認證 ê 學生應該 ài 佇升學考試加分，報考「國家」證照考試、公務人員考試等，嘛攏應該加分鼓勵。公務人員、「國營」企業、「國軍」等招募人才，嘛應該 ài 特別設定有母語專長會當優先錄取 ê 名額。
針對考試 ê 部分，嘛 ài 設計用母語出題 ê 考卷，予已經有相當程度 ê 考生來進一步加分，增加學習 ê 動力 kap 誘因。尤其是針對想欲考師範大學、教育大學、參加師資培訓 ê 人，用母語考試更加需要特別加分鼓勵。這攏是為培養未來用全母語教學 ê 科任老師做準備，按呢才有可能拍破目前教育體系獨尊中華語、對母語發展無友善 ê 歹境。
第五，針對這馬 teh 校園、公私部門內底母語使用無友善環境，主管機關應該 ài 比照「性別平等委員會」來設置「語言平等委員會」。除了提供語言平等教育，嘛提供使用母語受著壓迫 ê 人，有申訴、救濟 ê 管道，來改善使用母語無自由 ê 狀況。主管機關嘛應該 ài 提供校園、公私機關各種本土語言通譯 ê 資源，予各族群的自然語言會當自由流通。
【十二年國民基本教教育本土語文課程綱要草案草案北區公聽會】直播：
［第一段］
［第二段］
作者：孫博萮
台澎法理建國工作者
