小黨、新政黨、第三勢力，tsia-ê概念雖然無仝，佇台灣政治現實當中有真大ê共通性，佇tsia就簡單用新勢力來通稱 。是按怎台灣ê民主需要新勢力？除了通代表較多元ê利益佮聲音，時常講著ê理由，koh有會當防止大黨腐化、違背民意。無疑悟，這段時間看著ê，煞是新勢力切換立場、反背支持者，koh較緊，koh較雄。
時代力量黨到頂禮拜猶teh放風聲，講有可能提名立委黃國昌選總統，隨koh否認，mā是到最近，才teh聲明袂和主張『兩岸一家親』ê台北市長柯文哲合作競選。毋過，長期以來路線不明，主導者和早就明顯親中ê柯行真倚，興攻擊民進黨和總統蔡英文，致使這个無幾歲ê小黨內部tak
kah亂操操，兩位區域立委退黨，黨ê信用也著重傷。
 |
| 政治人物立場轉變傷大，會『掉粉』。若是烏枋拭仔，古早愛用棍仔拍，tsit-má攏用這款機器吸。 （圖片由作者提供） |
畢竟，趁日頭花運動民氣當旺成立ê時力黨，2016年立委選舉是和民進黨協調，有相當ê合作，符合泛綠選民期待，才通選kah hiah媠氣。2014年底，無黨「素人」柯文哲選牢台北市長，背景mā類似，了後伊煞愈來愈親中，koh歧視言論袂煞。到準備選總統，組黨，啥物勢力攏會當談，予人看破跤手，原來是全無原則，要意個人利害佮恩怨爾。莫怪「落粉」落kah袂輸teh sut烏枋拭仔。
⑤有teh傳考慮和柯合作選總統ê小黨，koh有親民黨。這mā真奇，對泛綠來講，柯已經變色，毋過對親民黨ê支持者來講，伊敢已經是家己人？
以上所舉ê新勢力，本底就無清楚ê路線。毋過你共看，喜樂島聯盟號稱獨派，舊年成立ê時，泛綠抑進步陣營共鬥贊聲ê人koh袂少，tsit-má煞完全是一个「仇英」ê組織，為著欲共蔡英文khiú落來，和國民黨聯手mā會使。
甚至有國際綠色政治傳統ê綠黨，這幾年mā予社運箍仔ê前支持者批評已經變質，失去原本ê進步性佮主體性，成做民進黨邊仔ê「小綠」。看起來，路線這款物件，mā並毋是有論述，就真好維持。
新勢力毋是一定會無穩定，只是較有這種傾向。大黨敢若一隻大船，欲踅頭真慢，伊ê政客、黨員、支持者，甚至歷史、對外關係，攏是伊慣性ê來源。國民黨過去親美反共，到現時反美親中，這个轉向，mā是著行幾十年。
小黨無仝，真少人就會當影響。主導者換人，抑是換想法矣，政治方向就會改。這種特性袂oh了解，只是佇台灣短短ê民主歷史內底，若像猶毋捌像這擺，表現kah
tsiah-nī顯目。
⑩特別是提名總統候選人ê「門票」這號物，會當按呢耍，予人看kah強欲gāng去。依法，頂一擺總統選舉、立委選舉選人佮選黨ê部分，其中之一提著5 pha 選票ê政黨，這擺會當直接提名總統副總統候選人。現時除了國、民兩大黨，koh有親民黨、時力黨符合資格。一直傳言這兩黨欲共門票提予黨外ê人來選，連鞭講是這位，連鞭講彼位，koh無一定是原本支持者會認同ê人，袂輸租牌予人營業hiah凊彩。
 |
這毋是袂使，是講選民會按怎看？尤其時力，頂遍牢ê立委，五位tann賰兩位，這張門票根據ê民意，tsit-má佇tueh--leh？
真正ê問題，毋是當初ê新勢力這陣變做啥款，是選民會開始憢疑：我哪知影恁以後會變做啥款？綠變藍，凡勢會koh變綠，倒反也相仝。政治人物會變竅，選民mā會。「小黨無穩定」ê認知若普遍，新勢力ê危機koh較傷重矣。
作者：Ingsing
中年男，做過記者，現在從事貿易
