亡國做制衡 較輸無制衡
by Ingsing

圖取自三立新聞網

2018年地方選舉,定輸贏ê民意關鍵詞是「教示民進黨」,佇2020年總統和國會選舉,煞變做「亡國感」。

(錄音檔佇⇩⇩⇩)


原來,教示過頭會亡國。哪會和咱學著ê民主ABC無仝?敢毋是講,一个黨執政,在野黨共監督、制衡,伊若做了無合人民ê意,人民會當投票換別黨上台,國家通健全運作?歹勢,彼是國外,台灣有小可仔無仝,咱ê兩大黨之一,是親欲共咱併吞ê專制敵國。就按呢,人民通威脅現時這个執政黨ê,毋是「你若做無好,我換別人來服務,加較四序」,煞是「你若做無好,咱就做伙死」。

民主政治哪會舞kah若恐怖主義leh?代誌本來毋免按呢。會亡國ê,毋是共民進黨教示過頭,是共國民黨當做選項。

國民黨見擺若選輸,就講欲改革,這陣 koh來矣。其實國民黨根本ê問題,是伊ê意識型態佮利益,攏和台灣民主ê良性發展衝突。若是欲改予好勢,就是各方面著改kah完全無成伊家己。既然按呢,哪koh需要伊leh?哪無愛成立新ê政黨,抑是予其他ê政黨取代就好leh?

對國民黨ê政客來講,答案真清楚,因為這塊kha̋ng-páng猶真好用。70外年來,就是有足濟人認這塊車輪牌,不管國民黨uì欲反攻大陸、一度本土化,演變到tann反美親中共,攏欲綴伊行。

進前我佇網路頂佮Line看著一張支持國民黨ê圖teh傳,是規塊「秋海棠」佮台灣頂頭總漆青白紅旗,字寫「中華民國全圖」。奇怪,佇今仔日ê政見市場,敢koh有這項?這是代表啥物款政治願景?和現此時這个國民黨ê路線有啥關係leh?



這毋是用政治理念會當解說ê。真濟人票頓國民黨,只是久來慣勢矣。照講統獨是藍綠陣營基本ê分界線,毋過真濟選民對國民黨愈來愈予中共牽去ê情勢無認捌,koh自稱「投予國民黨但是無想欲統一」。比起其他政黨,國民黨加足有利ê,就是有大量這類長期養成、毋知teh投按怎ê「習慣票」。

所致,內部tak kah 亂操操ê國民黨,才會佇選輸koh黨產予人追討了後,koh袂四散。Mā kan-na這个黨,會不時有彼種選舉ê時已經出走ê人,佇黨慘敗了後,koh走轉來爭正統、喝改革ê怪事。國民黨人已經無才調靠政治理念選贏,in做伙koh-khah艱苦,mā著倚傍佇舊kha̋ng-páng下跤,才通食習慣票。

按呢ê國民黨teh講改革,當事者當然是為著家己ê利益,想講粉小抹一下,後回會較好騙票無。外界若綴teh喝燒,毋但是加ê,實在有bái無好。

最近有寡台派ê論者,建議講國民黨愛做「華人民主燈塔」、愛徛蔣經國晏期「三民主義統一中國」ê立場。In ê動機善良,認為按呢對台灣ê民主,甚至中國ê民主化,攏較好。內容不論,我先問in一个問題:「若是國民黨真正變做恁設想ê按呢,你票會頓予伊無?」

我ê意思真簡單:你既然袂頓予伊,替伊想hiah濟欲創啥?伊是按怎愛聽你ê?彼敢毋是予猶對伊有認同、有想欲投予伊ê人去煩惱就好?

有人講,國民黨是上大ê在野黨,伊若健康,台灣ê民主才會健康。我講,就是眾人普遍認為國民黨一定是兩大黨之一、毋是執政黨就是上大在野黨,伊才通tsiah韌命,明明是愈來愈偏激、無負責任,煞只要大眾對民進黨不滿,伊就準備上台。2018是按呢大贏ê,2020推出hiah漚ê候選人,總統票koh提39 pha;政黨票mā有33 pha,佮民進黨欲平濟。

除了佮意國民黨執政ê習慣票,koh有上無愛予伊做強大在野黨ê習慣票。前者投ê凡勢中年以上ê較濟,後者少年人mā袂少。這擺選前我看著有大學生講,總統伊投蔡英文,立委欲投國民黨,按呢兩黨才會當平衡,像美國、德國、Canada攏是按怎拄按怎。

Aih,攏照西方、甚至是想像ê圖像來看台灣,你就袂看著台灣現時ê兩大黨是代表無仝國族認同ê特殊性,mā袂去思考是按怎做執政黨愛有資格、做上大反對黨就攏免資格?

若欲台灣ê民主政治好,就愛拍破「國民黨一定做大黨」ê觀念。同時愛一直推進台灣認同,予國民黨輸koh-khah忝,上好是倒去。著,中華認同者袂消失,毋過in ê位置,mā毋是靠台派保留予in--ê,in mā想欲koh提著政權,台派共防止都驚袂赴矣,曷著去共人鬥想出路?

事實上,國民黨mā袂改善,第一擺政黨輪替到tann 20冬矣,經驗敢猶無夠證明?社會愈熱心期待伊改,伊愈無需要改,因為這表示恁攏認定伊是唯一ê替代方案,無伊袂使。台灣人敢有tsiah-nī卑賤?敢講連一个無國民黨ê未來都毋敢想像?這種心態無改,國民黨就真有機會通收抾無真心欲統ê習慣票,koh再上台,共國家tshuā對予人併吞ê方向。這是偌危險ê代誌!

轉來到標題,毋是講民進黨執政無需要制衡,是無需要用亡國ê危機來制衡。共國民黨排除了後,才有可能出現較正常ê照政治理念分佈ê政黨態勢,mā才會發展出袂傷身體koh有效ê制衡。這當中,憲政體制ê改革是一種方法,毋過彼是另外一个議題矣。

作者:Ingsing

中年男,做過記者,現在從事貿易